Идэлхүү булхай авирт
Ихэмсэгийг мэдэхгүй
Элдэвлэн дуурайгсад
Энэрэхийг мэддэггүй
Эвийг бусраагсад
Элдэрийн сэтгэлээ арилжиж
Хөрстийг ухаж
Хөвч ойгоо огтолж
Хөрөнгө хурааж
Өндөр сэнтийд дулдайж
Үрс олныг зольдог
Үгээгүй олныг бүтээж
Өрийн үйлээр хөлжиж
Эрхэм өвөө огоорч
Энэхэн биеийн тухын төлөөнөө
Эргэх дэлхийн амийг үгтээх
Хөрөнгөөр цойлохын төлөө
Хүмүүний хувийг хугаслагч
Олзны ихэд дурлан
Оймтгой зандаа эзлэгдэж
Олны хишигийг хүлүүлж
Омогтон болж хийрхэгсэд
Хүний зовлонд хөлжиж
Хүслээ эдэнд захируулж
Оршихын учрыг танидаггүй
Онохуйн үйлийг мэддэггүй
Осолдох үйлийг үйлдэж
Олон үрсийг дагуулж
Таалан хүртэх зоог
Тухлан амирлах өргөөгөөр
Ид болгон бахдуулж
Идэлхүү авирыг дэвэргэж
Хүн хүнээс олохын төлөө
Хөнөөл үйлдэхээс ч буцамгүй
Хөрөнгөө аривтгахын төлөө
Хүнийг хөнөөхөөс ч эргэмгүй
Ийм л төрийг
Ийм л төрлийг
Ийм л авиртаныг
Ихэсээс нь эхлүүлээд
Түмэнд таниулж
Тэнгэр гэсгээж буй биш үү

Даян дээрхийн дуудлага

Дээрээс ерэн есөн тэнгэр

Доороос далан таван тэнгэр

Гучин гурван номт цагаан тэнгэр

Ерэн тэнгэрийн элч болж явдаг

Зуун тэнгэрийн зууч болж явдаг

Хишиг тэнгэрийн хэлмэрч болж явдаг

Хар тэнгэрийн хайгуул болж явдаг

Хар цусаар хоолоо хийж явдаг

Шингэн цусаар ундаа хийж явдаг

Арын арван найман галбир

Өврийн дөчин есөн галбир

Хан богд ДАЯН ДЭЭРХИ хайрхан минь

Гал тахих ёсон

Ц.Дамдинсүрэн гуайн Монгол ардын аман зохиол зуун билиг оршивой хэмээх 1959 онд хуучин Монгол бичгээр нэгтгэн хэвлүүсэн номоос

 

Дээрх мөнгөн тэнгэрийг

Дэвсийн чинээ бүхийгээс

Доорхи этүгэн эхийг

Өлмийн чинээ бүхүйгээс

Сүмбэр  уулын довон бүхүйгээс

Сүн далайг цалциг бүхүйгээс

Үүдэн заяасан гал галиахан эхдээ

Өөх тосыг өргөнөм

Эсэг дарсныг дусаанам